一）槍會邀請去玩槍，射把；
二）繼續野人定向活動。
結果人總是犯賤，有冷氣的嘆，有槍玩，十分刺激的活動我唔去，跟左班野人去有熱，又鬼咁遠的南丫島跑定向，結果我今日得DISQ.（即係話我今次冇乜賽程可言．．．）
最終選擇放棄了槍會班人仔後，按野人約好的時間搭11：30的船入南丫島。今次冇上次咁失威～搭錯船，十分肯定地走去搭榕樹灣，去到入閘位，見到好多人，在人群中見到會長同夫人，打尖咁走左過去，佢地話11：30已滿座，但會加班船在11：40開出。之後夫人話亞糖已經入閘，佢自已一個早到搭早船，我當時心諗應該會有Harbour或亞飯陪佢搭，但向後一望，佢兩個都係度，即係話真係亞糖一個搭船走先！
上船後，佢地三位女士（夫人，飯，Harbour）都急急腳咁找個中間位坐，話冇咁暈船浪，起初我以為佢地講笑，但當隻船行行下左搖右擺時，佢地三位又合上雙眼默不作聲，我就真係相信佢地係怕暈船浪啦！（其實我以前細細個住圍村村屋冇乜機會搭車同搭船，一有得搭我就一定嘔，但隨年月過去，周圍去，對於暈車浪/船浪呢樣野已經冇乜反應啦～當然如果要我連續坐兩次過山車，我就一定嘔）。今次的確好大浪，落到船，都好似未有腳踏實地的感覺，個頭都有0的暈。
去到碼頭終於我地與糖相遇啦～！今次我們除了自已友之外，小梅帶了兩位朋友來，但好似一直都冇介紹過佢地叫乜名。結果我地九男女就在南丫島的中心位置，有副好大空曠地的大排檔食野，佢地的食物樣樣都好似好好食，大家都唔知食乜之際，我地問左對面位的亞叔佢個碗係乜，結果按佢指示，我地都走出位睇睇有乜好食！佢地的餐牌紙貼在牆上，西式會打橫寫，到燒味類就打直寫，我好暢順咁讀比Harbour聽有乜燒味之際，夫人佢將個餐牌打橫睇，結果明明係叉燒飯，油雞飯，燒肉飯，燒鴨飯同豬頸肉飯。但夫人就睇左“叉油燒燒豬”同埋“燒雞肉鴨頸”！所以佢睇唔明乜野係“叉油燒燒豬”，笑死我！
由於間大排檔位於定向人必經位置，所以要尋人都好容易。亞B同Jason同船，但唔知點解Jason比亞B早到，而且來到又分台坐咁奇怪，就係咁我地呢班人又有故事講啦！！未去比賽前，見仲有時間，大家都行左陣街先去賽事中心。
賽事中心位於士多地方即陰間，由於天氣十分熱，個個都好似想著住件泳衣去跑咁。我之前場比賽借了頂帽比小梅，佢今日還返比我，但因為佢個朋友冇帶帽，結果我與頂帽又再一次分離啦～！
換完衫後，大家都開始準備出發，今日有帶水袋的都帶水去比賽，我都有帶，但唔係好想拎出去，但最終都聽佢地講帶水出去。
去pt.1 唔係難由大路去，不過有個成日講野的年青人，佢周圍問人你去邊個point，pt.1去pt.2先由大路去，但唔知點解行行下轉入山路上山，但其實由大路去係去到gei…咁熱上山好辛苦，好快去到山頂轉個彎，見到大路，去到pt.2附近又和糖相遇啦～！原本去到正pt2個位，我跟本見唔到個point，之後行遠少少睇，見到啦！不過要落去真係好難，我用最原始的方法，滑草落去，打完之後就用個口含實張圖，用雙手爬返上去。上返大路，都跑左少少，但又行番啦，個頭開始痛，而且個嘴唇開始乾，飲完水都好似冇乜變，去到pt.3的石位打完，有少少暈感覺，結果冇繼續上山，見到亞B調轉行，結果我又行返落大路想休一休，落到大路有樹陰，舒服左少少之際，見到亞飯，亞飯話佢唔想玩，聽完呢句之後，我回應佢，好！我都唔玩！而且我好似有少少中暑！
決定放棄之後，我們到一個路丫位有樹陰有風的地方休息了一回，中途見到唔少賽員，感覺有點不好意思～！但的確個頭越來越痛，而且個臉越來越紅！等了一回兒，我們離開啦，行返到point2的位置，頂唔順，我好似又暈暈地咁，又要坐多一陣，在這兒，我和飯遠望山上的賽員，還看到擬似愛麗B同擬似小梅的賽員。
返到賽事中心，個頭又痛臉又紅，好好休息一陣！等了一段時間，佢地返來啦！亞飯第一個落水玩，之後亞B同糖都落水玩！在更衣室換衫之際，聽到有人話有野外定向賽員在山上出事要消防員去救，換完衫後，就問大會人士八卦下啦，結果真有其事，當時由於夫人遲遲未返，我都有問Bruce會唔會係Alice，但佢話大梁在3號point見過夫人，傷者應該唔係佢，之後我地又見到直升機飛來飛去。
等左好耐都未見夫人，使唔使去尋佢呢？不過人地老公都未動身，我地都係去玩下先啦，結果唔單止亞飯，糖同亞B，仲有我，Harbour，小梅＆friends都去玩水啦～！
右面兩位已經Ready啦!玩完水之後終於見到夫人返來，原來佢頭先一直在救人啊～！我們一直聽佢講經歷，一直都不斷讚“夫人妳好叻呀！” (意外事件經過請參看夫人個blog http://hk.myblog.yahoo.com/laichi-li/article?mid=12370 )
等夫人休息完我地打算起行離開啦，係呢個時候亞B一句“Bruce你調轉衫著”，又令我們笑了一大餐，因為佢呢件“龍城定向”的衫調轉著，已經唔係第一次！
好笑的野會一浪接一浪，我地行出士多不久，亞B又有新發現啦，佢話“Bruce你條褲咁多針gei?”我們一睇，佢pat位的確有針，那一刻，夫人突然醒起個條褲係縫製中的階段，還未完成，佢於是立即將0的針拔出來，我們見到他們那麼狼狽已經笑到出眼水，一路問：「點解Bruce的pat位咁多針，但佢行行坐坐左咁耐都唔覺？」，而另一邊又問：「點解夫人又縫縫下條褲點解又唔縫埋佢，而且又要咁多支針呢？」．．．．． 謎
我地一路行一路笑，最終去到亞婆豆腐花啦～！食完豆腐花，行返去碼頭，忽然有兩名定向人急急腳路過，佢地話趕緊6:30的船，但當時已經係6:25（而我們的位置係離開亞婆豆腐花附近），我和亞B打算早走，結果就起勢咁追（只係我，亞B好輕鬆咁跑），追追下突然醒起亞媽托我買手信，唉～！又跑返轉頭去買，結果買完之後我唔使跑，隻船走左啦！去到碼頭，碼頭個位先生叫我入閘搭船，我話我去中環wo，佢話有船呀上啦！我再疑了一回，佢話加左班船，上啦～！就係咁我上左6:40的船離開了！在船上，又遇上其他定向人，PolarBear話佢個仔係童軍，於是我諗住同佢傾下啦，點知佢個肥仔點都唔肯同我講野！！
返到屋企，個頭仲係好痛～！聽其他人講返，槍會好好玩．．．
P.S.
這是8月21日補加的 , 在無意中得知 , 當天的傷者, 已經離開了 ! 安息吧 !
因為生命活得有色彩 , 才會為失去色彩而可惜 .......
應該是6:30pm的船
回覆刪除我跑到死死吓, 才搭到6:30pm的中環船. 早知跟妳, 輕鬆地搭 加班船啦