美麗．因為心仍在跳動！: 食食跑跑食食~深圳賽

昨天去完迪士尼，開始有點累了．．．．今天幸好到11：15才出發離開屋企。今日去深圳跑定向, 有點特別, 因為今日跑越野 , 微型及百米的公園定向賽。今次去深圳冇跟大隊(會長同夫人) , 因為佢地打算先由皇崗集合再去食街 , 之後再返筆架山公園，我諗跑場比賽，唔使去咁鬼遠食呀，於是我約了文太同怪傑12：00皇崗集合，上樓上食野，樓上間餐廳唔錯呀~有中式，有西式，我地有冷氣嘆，有電視睇，幾好呀!12：30已經食完野，見有時間吹多陣水，聽文太講起佢個仔，好好笑！之後聽返佢地講，我絕對冇後悔我唔跟佢地去的決定。

去到比賽場地，有個好大的草地，感覺好舒服，但好多蚊，痕死我啦～！幸好有部份家長有蚊怕水，有止痕膏．．．當時我心想“始終都係媽媽好！”今次係我第一次玩微型定向，起初我以為可以打曬佢，實冇死啦！原來大會話唔得，打錯左仲要返終點前在眾目葵葵之下跑罰圈～！

由於好多人都未試過咁樣玩，所以都安排左呢部份的負責人B佬負責講解玩法～！我當然好留心咁聽佢講啦！起初B佬負責用廣東話，而有隔離位就用普通話，但由於唔能翻譯原意，最終B佬用佢廣東話版普通話同大家介紹啦！

眼見佢地一個接一個出發，我都好心急tim!

等的時間，我通常會望實同組的賽員一開始會跑去邊，哈～！望完有用，望到地圖的起點之後，就一支箭跑走啦！個場地由於在公園，所以唔係太難，跑到pt.2附近準備入point時，見到好多賽員Bruce同大梁由草叢衝出來啦，之後見到夫人同文太，見唔係差好遠，打完point已經急速起去追佢地啦，結果pt. 3 去pt. 4　中途追到夫人啦，仲比佢影埋相～Yeah！過了夫人，自已繼續跑，因為夫人見我跑，所以都帶動左佢有意志跑，一路我都知佢應該離我不太遠lor !

打完pt.6我好想由湖的霸位去，但再行前少少睇，好以過唔到，何況我唔識游水，一失足成…..所以返轉頭，比我遠遠望見夫人打完pt.6 ，　由pt.6 去pt.7唔由水霸去，就要返轉頭兜大圈，因為中間條穚地圖顯示係封～即唔比賽員過（返到終點睇其他組別先知，原來只有我條course係封）由於當時我以為其他組別都係咁，但又見到有唔少賽員犯規，由橋過，我只好一邊跑，一邊咀咒那班犯規的人。

由pt6去 pt7其他人原來大部份都由紫色路線去 , 本身去到湖角位 , 但好似過唔到 , 結果由紅線走(其實我唔知點解唔由白林去~白痴仔)

我知夫人應該過左我，但我又相信我如無意外，一定追到佢，但跑了一回都唔見佢，我就諗以佢份人應該“過橋”啦！（結果真係）打完pt.7去pt.8原來pt.8係微型定向，由於第一次，我都好小心，最終簡定走人，簡完都有少少唔對路，不過都簡左，算啦！去到pt.9我已經冇氣啦！而且後面有好多人追到我（我想只有我一個傻瓜冇由水霸過去，兜大圈花了不少時間）。去到pt.12又有一個微型定向點，呢個唔難，一路行一路打，走人。

玩完越野部份，轉圖玩百米，唔知點解，個指南針成日都好似歪了少少，不過唔緊要，因為基本上成個場的point都有，行歪了，望返行錯個個係邊就知去邊，但唔知係賽會玩野，定賽員玩野，我有個point先去38再去42但去到38未望到個punch但樹幹上的膠紙寫了42，結果我以為自已去錯，由呢個疑似42再打bearing去38，但點找也找不到，去去下，又比我發現另一個42的point，好奇怪，還未來得及思考點解之際，忽然聽到蔡琪大叫原來38在這兒。我一聽就過左去，點知個個38的位比人用42的膠紙貼在樹幹上，賽員要發現個打咭器才知道是38，結果有人做好心撕了那張膠紙下來。百米除了這個位，其他唔係大問題。

打完百米，先去做第一次下載成績，睇下使唔使跑罰圈，跑到差不多終點，先發現唔止我一個望，B佬佢又望，結果Yeah唔使跑罰圈，而且在耳邊還聽到B佬大聲叫“呢個（Julie）有排威！呢個有排威！”我其實都係一個沉默寡言的人，點會咁認叻呢～！^^

跑完之後，返到去問夫人，結果冇錯～佢真係用橋過！夫人除了比我話之外，原來文太都話佢冇體育精神！

跑完之後，一大班人去食自助餐，本身Bruce話冇人去，但要人有幾難！

就係咁，我們一大班人就食得好開心！原來餐飯要成150人仔，我一向去廣州跑比賽，我都係帶$300人仔，但去深圳唔係好遠，車錢唔多，所以以為帶$200去已經夠,點知唔夠錢食自助餐，當我仲諗緊問邊個借比我之際，有位人兄話佢有成$700人仔　～　＞＿＿＜　車！ (我心諗帶成七百幾蚊上深圳只係玩定向~講都冇人信啦!)

當晚有唔少野食，但好可惜我眼闊肚窄，食唔到好多野就投降啦！
~ ~ ~ ~ ~