全城奪寶在荃灣~

今日去玩荃灣城市定向，記得上次玩係同Bruce & 愛麗B一組跑＜龍城定向＞http://juliechiu1008.blogspot.com/2009/05/2009.html，賽區範圍較大，但賽員可以搭交通工具．限時兩小時，但上次係跑到我死死下咁。而今次一樣限時兩小時，而且唔可以搭車，就只有跑跑跑，不過唔知點解我今日跑得好輕鬆，而且仲可以等下隊友，唔通真係"跑得More”的成果？！

因為之前有毅行者，同其他訓練，所以今日唔係好多定向人去，而我基於利害（利益）關係，最終都係組隊女子隊～因為報名表話明頭十名都有獎牌（每人），而頭三名就多個獎盃（每隊），而且最少有禮券$100（每隊），即係話可以填返報名費，心想女子隊比混合隊更有機會獲獎，結果真的沒有錯！ 由於我係最後一日交填名表的，所以收到確認 信時發現自已的編號係07，我就知道今日女子隊的數目呢．．．．^^

大會要求賽員7:30報到集合及派發物資，但實際出發時間係9:00，足足要食1.5小時西北風呢～去到報到及領取物資部，大會要求三位隊員全到及出示身份證才能領取物資，物資包括每人T-shirt一件，比賽地圖一張及問題紙一張，唔講係咪每人一張圖，但一早派地圖咪即係有1.5小時去計劃路線問睇問題？結果人人都用呢1.5小時去計劃路線~! 但係其實可以出貓的地方實在太多啦~!

規則及玩法其實係咁:

1. 所有賽員必須穿著大會指定藍色T-Shirt參賽，以確定賽員身份．
2. 每隊有一張地圖及一張問題紙
3. 問題紙係選擇題，有部份題目係問東亞運動會有關的資料；另外有部份係問返去到個點至有答案的問題．去到個點，工作人員見齊一隊人先會蓋章，但蓋章前你要先答對問題，否則去到，又答唔到係冇印章的．
4. 限時2小時，超時者一律被取消資格．
5. 比賽以徒步方式進行
6. 愈多高分控制點，就勝！

差不多9:00，大會叫賽員集合，但其實賽員身上冇號碼布，而且出發前又唔點人，問心如果有隊一早走左都冇人知啦！不過我們是”真正”的運動員啊！

出發啦～一大批公開組的人仔出發先，我的組員一開始已經說”今場比賽，只為取回報名費，故千萬不要超時”為目標，但玩還玩，我們也是認真的，雖然放棄了又高又遠的圓玄學院的point，但油甘頭碼頭及荃景圍都要去一去，一開始我們已經拔腿狂奔，向碼頭進發，就係咁，我開始Feel到我的體能真的進步不了，可以Keep往一直去一直去，由於張地圖沒有比例，所以我們在跑的時候才發現碼頭真的比想像中遠，去到碼頭，第一個問題係碼頭支燈柱寫了什麼數字，答完，但當時工作人員跟本未Ready（呢個point算遠都未Ready，咁如果有人一早去近少少的point咪連工作人員都唔見？），我都唔明，賽員都7:30報到啦，但工作人員到9:00都未放學point （給大會意見留在最後才繼續說）,

打完，我們又走了，我們今次分工係～邱鍾華負責拎圖及睇圖，我負責答題及去印蓋章，Josephine負責找答案，可能真係跑得More關係，我都一直在前走，打完第二個point便開始向荃景圍進發，上次石龍拱我見人由荃景圍天橋落車，再行上去，已經覺得傻仔。估唔到今日居然輪到我．．．

去到後條問題係問"公園有幾多個入口"，好醒的我們第一時間走去張公園地圖上看，好快知道了，之後就開始衝落山去體育館啦．．．．．．．我們經過華卜公睇噴水池有幾多層，又經過三棟屋睇佢門口兩個瓦崗封口是什麼顏色等.....好快打完，今次係邱鍾華負責睇圖，所以我好放心咁聽佢講去邊就去邊（因為佢係我一開始玩定向已經想跑過佢的人，今年我要實際地跑過佢）．．．結果去完惠荃體育館，我就已經感覺到大家唔會再上去，所以開始向下方的控制點進發。去到大窩口地鐵站附近（我以前地頭啦！）所以好快咁衝落去個公園洗手間附近，見到兩位童軍仔負責守point，呢個point的問題問東亞運動會共有多少個比賽項目，答題紙上已經答了，但唔知點解位童軍仔又繼續問多兩條問題，當時我地已經話呢兩條唔係我地個組答的，但個童軍話大會叫佢地咁樣做，佢一邊繼續問，我一邊望實佢張問題紙同答案紙，佢未問我就答曬佢的問題（當時我心諗童軍仔你邊個旅團，我一定記住你）返到去，問返其他組，佢地都係有同一個情況。

打完條街的point見仲有好多時間便一口氣跑埋去9號point啦，沿路去的時候遠望見到有支藍色的旗仔係人群中不繼移動，結果我地就追，追到啦，答埋問題，蓋印走人，向終點進發。

我地返到終點，好奇怪，有好多人仔熱烈歡迎，而且仲拉埋banner比找地衝線（還有好多大會攝影師），之後又有好多人走過來問我地組名（感覺就好似奧運田徑獲金牌的運動員一樣）～冇計，因為我地係女子組最早返來的一隊，時間只花了1小時31分鐘，但交完答題紙，就有人問乜冇蓋曬所有印仔？我地已經答佢緊係去唔完啦！

等多15分鐘多，開始陸續有人仔返來啦～！

其實玩開定向的人都有個習慣，見成績公佈才有頒獎，但今次好奇怪，大會好快咁就叫某些組別報到，準備領獎，當時一名資深定向人第一時間向大會查詢自己成績分數，大會在毫無理念要公佈成績之下，將他們的分紙交回他們check分數。最終在獎項未公佈時，大會最終都將各組別的成績公佈。

最終我們只取了第四名（達到我地最基本的題標～取回報名費）！其實定向人成績（我認識的）男子公開第一名：泰仔組；男子公開第二名：張志高組；

女子公開第四名：Julie組，頒獎時有樣好得意的事發生左，個頒獎嘉賓無啦啦問我是否應報錯組，我問點解？佢話我應該玩學生組，哈！所以呢一刻我笑成咁（有相為證）。

混合公開第四名：飛生飛太組；混合公開第七名：成坤組；

家庭組第三名：B佬組

個個都滿載而歸，之後跟左大隊又去食我至愛的中式自助餐。

Feedback :

1. 場比賽有好多漏洞，晨咁早報到時派地圖，但派完地圖後又冇限制賽員活動範圍，賽員一早走左去個POINT 都冇人知．
2. 出發時跟本冇人去點人數，所以一早唔見幾隊都唔出奇。
3. 早上七點半叫賽員報到，但係當出發後，部份控制點的工作人員跟本未ready，我第一個point其實已經好遠，但去到佢地都未set好野．而B佬個組先去近的point，點知連印都未 有，要佢打電話返大會問點算好～就係咁浪費時間，冇左第二名啦！
4. 同以前城市定向一樣，一組一張地圖。
5. 地圖沒有顯比例，所以都擔心會走得好遠．
6. 成績跟本未公佈就打算頒獎，如果唔係一位堅持要成績的賽員，我地都睇唔返成績。
7. 人人有份的獎品其實都係賽員參加的推動力，如果只有第一至三名才有較高的獎金的話，我想大家都會好無引．．．今次頭10名都有獎，真開心！