美麗．因為心仍在跳動！: 迷失了的14號point ....HKOC錦標賽

本身諗住夜晚去觀星會好凍，加上住新界區氣溫低幾度，所以今朝都著好多好多衫～！點知去到荃灣～已經變左個火人（熱死人啦！）

去到找到位食完野，跟Harbour去洗手間，收到夫人話大家都搭的士，所以我地就直接去到的士站，去到的士站，已經見到有三個人，本身我都冇諗住跟佢地車，但五人的士剛好人齊，結果上了車。我地上左兩部的士～就在上落的過程中，Jacky唔見左部電話！可惜，我地幫唔到佢d乜，查理斯幫手打去的士台問，我諗都係凍過水！

落左的士等埋夫人佢地準備開始上山，點知佢地一出車就想殺左我～原來佢地在電話上話等埋我搭的士，而唔係話比我知大家去搭的士，結果係佢地的殺氣之下，我不敢再直視佢地。（咁我真係唔知你倆個話明同我一架車ma….）

去石龍拱基本上都要行一段好遠的上山路，對於上山的路段照理夫人應該都會一直在我們的背後！

大家都係一樣，一路行一路剝！最終花了半小時去到賽事中心啦！

今日查理斯帶了個shelter來，大家在山上揀好塊地，就開始起家啦！

終於有個瓦遮頭啦!

今次賽程ME&WE係一樣gei，而且男子組會出發先，所以我要到11：52才出發，基本上我出發的時候應該冇乜人！等等下仲已經有人完成左，而且仲一個接一個，最後仲聽到周生都已經返左來，唔知到我出發時，個山仲得返幾多個人仔呢～！

等等下，亞飯佢不斷被人讚，讚乜？個個都話佢瘦左，這個讚美我相信冇女仔唔鍾意～所以亞飯佢笑到見牙唔見眼呢！想讚女仔的話讚佢瘦係開心過讚佢靚左ga !!

之後見到上次白理義個位伯伯，同佢傾左一陣，突然間醒起上次聽佢講話來香港一個月到，但奇怪佢咁都帶埋d定向用具來，真熱心啊！而且今次位伯伯冇帶指南針，我為佢擔心之際，佢就二話不說地問我向海個邊係乜方向，就係咁，佢就出發啦！而我都出發！

由於之前扶輪公園＆河上卿之後，我知道第一個point死左就真係死左，特別是今次張圖都係1:7500，所以唔可以唔小心!!

＜＜＜ST. - PT.6 ＞＞＞

ST-Pt1

出發之後，不繼咁上山，唔知係咪之前去賽事中心同去起點不斷上的關係，自己隻腳好累，但係因為第一個點要小心，所以都係慢慢地去，好快見到point１

Pt.1 – pt.2
打完1，打bearing去point2 原來, 過兩個綠色去第二個山咀再入少少見到啦!

Pt.2 – pt.3
打完2，去3，一直去一直去，未去到三個泥坡時見到亞姐，亞姐由林行返出來，因為我係最後出發個幾位，而且我冇諗過我會見到佢，所以潛意識話我知佢唔係找緊我要的point，佢應該去緊其他的point，點知去到三個泥坡的位～Oh!過左，返轉頭去啦，但又唔係好見到，兜了一輪，連群仔都出現，再望遠少少連亞飯都見到（佢遲我4分鐘）結果原來頭先見到亞姐出來的位，就係個point的位！（呢個時候我仲未知道原來自己有種顏色係唔識睇．．．）

Pt 3-Pt 4
見到亞飯，心急了～所以知道跑邊個方向後就跟住群仔去，結果跟人當然出事啦～跑跑下群仔消失了，但自已呢？發現個point都消失了，死火！亞飯也來到，佢好似講左句“唔係呢邊”～我再睇圖，最終定了位去打point啦！

Pt.4-pt.5
打bearing望上山已經見到個point ( 記往係望上山)．．．過左墓，就已經好勇直接爬上去，上到去個位剛剛好，見到舊石，個point就係隔離。

Pt.5-pt.6
亞飯都一直係我後面，呢段路之後，我們分開了！打完point 5，上到頂的標高柱後，有兩個選擇，一係沿北面小徑落去，去到路交位再沿東面小徑去，二係直接向東面山咀去，其實去到，都唔使諗，見個咀都好似落到，結果就衝左落去啦！見到條小徑，望多望見到個墓，打完走人。由於亞飯落山較小心，故此我就乘機打完point即閃人。

Pt. 6 – pt.7
打完之後沿小徑去，一路行都冇少少擔心唔知邊個位上返去，結果轉了路彎後，行多少少見個林可以過到，而且開始平少少，就穿返過去，一去到好大個空曠地，見到個墓，再行入少少見到堆石，打到個point啦！

Pt. 7 –Pt.8
出返去個空曠地，遠遠見到飯睇緊圖，由於當時我見到另一位ME人仔一支箭咁跑落山，我又學佢一支箭咁跑落山。跑落去個屋仔附近，無啦啦見到行返轉頭（我仲諗乜佢同我唔同組咩？原來事後先知佢跑落山時唔見左張指咭），過左建築物，再揀好路就上山啦！行行下，遠遠比我望到夫人，但好怪佢好似落緊去個綠色的山窩，冇理佢，行埋上山，打埋個point走人。

Pt. 8 – Pt. 9
沿路落去，去到差唔多位，見到好幾個人仔找緊個point，但一於少理，行入少少見到個point打完，好快又衝落山！

Pt.9 - Pt.10

衝落山撞到大路，揀埋條路再直去，見到個墓，再直去見到空曠地，望多兩眼在堆植物後面見到，打完直接向 pt.11進發！

Pt. 10 - Pt.11
揀好方向，衝落去，見到個山粒大石，而且有好多人，好彩唔後我上去，去凹位好快見到，轉身見到個墓同條路，向Point 12進發

Pt.11- Pt.12

條路一路行都有懷疑，因為方向總有點問題，而且都密少少，但可惜冇得擇，我只知道見到大路就得，好快見到大路，望遠少少見到個墓，而且見到時光機啦～！（佢比我早12分鐘出發），去個墓時，聽到Harbour大叫 "0下！見到Julie !! "，當時我心諗預到我你一定”迷緊路”，因為Harbour雖然唔同我同course但比我早成30分鐘出發，呢個時候仲見到我～你迷緊路啦！！
Pt .12 - Pt. 13
我見時光機向東北面路行，但我諗了一諗，沿南邊大路去，一路行都一路諗點去pt 13好，因為我擔心去錯位，見唔到pt13，結果就想在小徑連接處上去，但唔知點解一路行望去左手面都係一直都係綠色，而且右面又好似唔肯定係唔係小路，結果最安全的方法就係由泥坡上去，沿泥坡去被我發現條小徑，一路行行下，好快比我發現個pt13啦！

Pt .13 - Pt .14

打完pt.13就衝落去啦，因為知道方向向邊去，而且望返手錶，時間仲未有一個鐘，所以都心情好興奮～好快返到終點啦！一口氣衝到去空曠南邊，見到個Point以為自己中啦，點知去到發現個point叫40，但我找個個叫62，當時我心諗點解唔對？唔通睇錯圖？周圍望了一望都唔見，結果跑返出去，再用大路，小丘定位，再入去，奇怪？又唔係，之後發現附近山窩粒石有個point，無意識地走去看，當然不是自己啦～佢叫39，我嘗試用找一找這個39在地圖的位置．再用呢個point定位去找我的62，但係無論點都找不到，時間不斷過，在過程中亦不繼嘗試尋找，浪費的體力，突然回頭一向，望見遠遠的pt.13有一個橙色和藍色的人仔，即係話亞飯同時光機也很快會到．心情更加急！在無助之際，我最終叫了出來”我找不到62”，結果意外地有位賽員回應我一句”就在入面”，我抱半信半疑的心態入沿40號入去，再入再入，最終見到62！時間花了00:14:09。

Pt.14-Pt.15

打完pt.14便一支箭咁去pt.15，追回Habour和剛才打救我的賽員，望見在石堆中有一粒特別尖的石頭，二話不說衝呀！打完走人！

Pt.15-Pt.16

打完pt.15，更要爬山打pt.16，由於剛才找pt.14我已經浪費了很多體力，結果今次上山簡直想拎我命，一路上都行下停下！最終打完pt.16。

Pt.16-Pt.17

打完pt.16又落上去大路數第二個小丘，打完，去終點啦！

Pt.17-End

我印象中賽員須知話水站設於終點，故此我一心以為去到水站更見到終點，點知去到水站，唔見終點，唉再要向前去～我當時心諗做乜個水站設在終點前呀～個個都衝左去終點先啦，點會咁得閒飲水～諗諗下見到終點啦！Habour之後都到終點。

返到去賽事中心，第一句就問ME的賽員係咪用了1小時完成，結果冇錯，如果冇犯錯，時間會再少10分鐘。