美麗．因為心仍在跳動！: 被流放在亞馬遜森林

之前答應幫YAOC的色級賽，但在河上鄉多番改變工作崗位的意願後（其實都係五分鐘之內發生的事），最終我都係選擇賽區。還記得從前在SOC幫手比賽，基本上都係負責起點，終點，成績等部份，次次要求賽區都好似冇次有我份，唯一一次就係地域的定向賽，我做Course Setter所以理所當然當天負責賽區。喜歡賽區是因為我喜歡自由度大的範圍，而且睇圖放point一定學到野，加上在山上看到唔同的選手比賽，影下佢地的靚靚相，不亦樂乎呢～！（其實係好鬼辛苦ga）

在比賽前，Bruce比左張賽區的Master Map我睇，看一看自己負責的範圍～天啊！我負責白林，一向認識的大帽山都係多石多草的山頭，乜大帽山有白林ga?? 其實白林對於定向人來說是一個好鬼恐怖的地方，因為係最容易迷失的地方，而且仲有好多看唔到的小動物，同廢柴。看完分區圖後，我第一個反應係“白林啊！～點解係我？”，不過一分鐘之後都冇乜野啦！因為今次唔係我，都有其他人啦～故此安然接受安排（其實係冇得唔接受安排）。

由於負責賽區，故此理所當然要先去一去賽區先，故此星期六幫手去落Stand（即係打unit個支柱，而個unit同Marker就會比賽當天才放上去）。去之前一天，收到負責人Jason個e-mail；copy from原文

“各位：
現在通知明天落tape集合時間地點。
地點：荃灣地鐵車厰古屋里（見附圖）
時間：早上11點正
請你自備午餐食水，按進度我們應該可以3點落山。之後可能去荃灣tea，看時間！！！
大大梁，明天早上我有事，不能在馬鞍山車你喇！sorries！！
Julie，你明天落白林（好斜的白林），請你自備手套，同埋可能我會比一個partner你，看到時候情况。　　　

Jason”

睇完段野～我對眼都淨係見到“係好斜的白林”同埋“請你自備手套”呢幾隻字！即係點．．．有d擔心！

星期六，終於上山啦，在車上不停有人問Julie你做乜咁勇負責白林，但其實我跟本冇要求過．．．而且我跟本意識中都唔知道原來大帽山係有白林呢樣野！所以睇完圖，我都一定問，我應該點解落去會安全呢？

去到停車場，準備好物資啦！我的Point大部份都係啡組同藍組玩，所以第一日都可以落9成的Stand，柱其實真係好重，你睇朱仔點都要用背部帶去，就知用手拎係幾重啦！

一開始由個咀落去，已經有好多小動物跟隨我，落去到仲見到成個有山有水的森林一樣，今次要在白林找tape帶，仲難個找個point，起初我都迷左一陣，我仲諗唔係第一個point就死呀！好彩，定一定神之後，一切都好順啦～！只不過在山窩山咀上上落落，痛苦萬分。我個位唔知點解成日都收唔到Walkie，所以如果出事都唔知點算，幸好我都安然回來！但係條路真係好難行，而且仲要拉住個袋。最終我係最早一個返去停車場gei，因為佢地的地點比我遠！所以我用等的時間去不斷咁拔我身上的草。

第二朝早，我、朱仔、Habour跟Michelle車上山，個山好大霧同有少少凍，大家安頓好大會物資料，賽區的人仔開始收拾啦～唉！即係話我又入亞馬遜森林啦！

有昨天的經驗，我都好快找到昨天的stand，大過個森林真係好森林ga！有山，樹，有石，有河，要由一個山到別一個山係要有技巧gei，先要將物資推落山，個人就滑落山，放好point，就要爬上山～重覆重覆。

行行下，忽然看到路上有條蛇，個心真係嚇左一大嚇，好驚！唔知點算好，但見佢不動，好奇心下，我再走前看一看，好彩！望真只係條蠅。

放完point，好辛苦咁爬上山去到施樂園後閘位，收到Jason電話話唔夠Marker，結果要我出返去大路交Marker，呢個時候，我有兩個選擇，一係滑返落頭先好斜的地方，再爬返上去，二係先上起點（行樓梯級再過去），之後先知原來可以仲有第三個選擇爬過施樂園的鐵絲網。我最終經起點去，行上條樓梯已經想死，去到起點，放低個落，又卜返出去大路啦，剛好～我到的時候大大梁剛到，成功交接，之後又返去起點食下野，同埋幫下手啦！

去到起點，一隻二隻見到我就好似見到隻箭豬咁，所以我都好唔客氣同佢地分甘同味>__<，之後食飽，見仲有時間，周圍影下相，結果夫人呢邊又話要一張，亞源個邊又話要一張，仲要影埋起點工作人員大合照～

張張都冇我份～所以我都要影返張相補數。

時間過得好快，開始有賽員到，今次起點分兩個入口，一個入口係啡組出發區（因為計算入錦標賽資格），二係其他組別的自由入閘時間。人數越來越多，而排隊入閘的人都越來越多，在天怒人怨之前，最終幫手開多條比其他組別的排隊入口。拿起份點名紙～我終於知道負責點名的Clive係幾咁可憐，份表用組別分好正常，但係點係唔係順號碼ga ? 佢順次序的方法係用英文姓名，即係你睇完佢賽員編號，但仲要問佢叫乜名～想死，點解唔順賽員編號ga….(改呀!) ，故此為求疏散人龍，結果我只檢查佢地的物資同抄抵佢地的賽員編號，所以好快人龍散啦！

功成身退，影多少少賽員相，我又出發去亞馬遜森林啦～！行完兩轉，已經收到賽區話有第一個藍組返來，但好奇怪，點解我唔見，當時夫人在Walkie話我眼大睇過龍，但真係？？最後我去到123個石牆附近安頓下來，等了很久，才發現有啡組的第一位賽員出現

（所以我好肯定之前藍組個位一定DQ），之後都有賽員經過，見佢地滑落去pt64號時好多人都PK，而且之後仲要找路過河，所以我個First Aid Kit好快就開封啦！

幸好有時候都遇到一些好得意的賽員經過。

但當一批人走了之後，又好多時候都冇人過～因為我呢區係啡組同藍組最後先去的地區，所以成日都冇乜人，自己一個在森林內，真的很悶啊！而且有種被YAOC流放的感覺=__=。

等了很久，夫人佢地負責起點的都走啦，原本我諗住叫佢地將我放Stand個袋由施樂園門口向山下掉下來，因為我在林下的地方，侍我收point時用，但係佢地居然冇咁做，而且仲將個袋放到另一個近路邊的Pt.127，我諗佢地認為收兩支柱應該唔使個袋，而且pt.127亦係我必經，所以放在那裡，但是我想信佢地係唔會想像到”爬上一個好斜的白林時，雙手的重要性，冇對手，我跟本未必爬到上去，而且兩支柱好尖，若果pk的話，隨時插死自已”，所以我都要去pt.127拎返個袋，至少支柱放在袋內，可以背著它們上山。

到收point的時間，難得賽區 IC 過來幫手收 point，太好啦！之後佢就去幫朱仔啦～！我繼續收，因為我張圖唔知去左邊，故此我憑記憶收回控制點，原來條路調轉行係好辛苦ga !
之後收收下發現條路唔對，但我又醒唔起上面台地有個pt，結果差唔多返到賽事中心時，收到電話話我收漏point。佢地個個賽區都較遠，而且近車路，所以佢地人人有車搭，唯獨我並沒有車～一路行返來，一路收point，一路拖著袋柱，背著背包，拿著Marker同unit返來，幸好最尾有亞飯仁慈地幫我拎一拎！

返到去大家已經收拾得七七八八，而我放下物資後就好專心咁拔我條褲的草針出來。最後來一張大合照，結束今天的活動啦！