天生天養

昨天在牛寮跑定向賽，除了場比賽自已有犯錯令到自已有點兒不忿外，還有這隻狗狗令我耿耿於懷．．．

行上賽事中心，有一隻廋骨如柴的黃狗在那裡不斷行來行去，目的～就只是為了食物。面對住流浪狗，心當然有點怕，擔心佢突然發難，咬我！但當我第二次在賽事中心看到牠時，望著牠的眼睛，有點兒像懇求我給牠一點食物，看到牠的眼神，有點兒不忍心，結果我便周圍問人有冇野食。

剛好定向界的亞姐與她兩位囡囡在午餐，而且已經在尾聲的階段，我便走去試試問一問。但亞姐告訴我這是牠的生存方式，不應破壞～當然她最終不願給我比狗狗食物。

當然她的說話有道理，我不用反駁！但面對著生命，真的有點不忍心，結果又再周圍走走問問。當時我還記得我的行為被人取笑（我好記仇）。

多番嘗試後，最終我還是失敗了～沒有人有食物！我只好望著那隻狗狗，牠沒力氣的趟在階梯上，動也不動。

在馬騮山上的馬騮，我的確痛恨那群改變了牠們生活習性的人類，但在面對狗狗那無助的眼神時，我真的不能視而不見（當然我沒有收養牠的勇氣）～或許面對的，不只是一隻無助的狗狗，而是一條很快消失的生命。

有些時候，總會希望能夠保持動物界天生天養的習性，但當面對生命消失前的一刻時，我們要面對的，到底是生老病死的自然定律，還是要努力拯救呢！

上上落落的牛寮賽

今日比賽地點係牛寮，在別人口中話係熟到爛的地方，但呢處都係我第二到咋～第一次仲係06年亞太賽的事．．．

今日自己一個提早上山，冇跟大隊上牛寮，因為有特別任務～要影Feature，教練班用呢！(不過唔跟大隊係會有報應的．．．．．省略~事後仲要比佢地話我功力唔夠深厚)　＝＿＿＝

去到賽事中心，當我正考慮在邊處做地頭的時間，油山換水的隊友都到左，就係咁，好安心放低行理在他們的地頭之後，去影野啦！

今日對腳的傷口（可參看愛靚唔愛命篇）剛剛結焦，但行起路都有少少痛，不過我相信跑完之後，０的傷口應該全部又開曬啦～！>__<

一段時間後，人仔已經到七七八八，數數手指，先發現今日有好多人都有來玩，一張大合照後，大家都好輕鬆的情況下出發，而且仲開盤，到底夫人今日會唔會DQ呢？

排隊等出發期間，我見到身後的Jacky用隻手拎住支水，我仲“下”了一下，點知前面個幾位女士又係個個帶支水～可能係上次的陰影吧！佢地仲叫我帶埋一份，我呢位懶人一於少理，不過都行返去飲多兩啖水。

起點－pt1

今次大會出發方式採用先登記法~相信會安全少少。由於我和夫人佢地成班人差唔多一齊出發，結果一開始就少不免集體創作，呢班女士一開始已經問，呢條路係邊？唉～我一路話信我啦，下面係大路呀～你睇下亞Ling同Jacky都係下面，佢地至信。

Pt1-Pt2

第一個Point唔難找，但問題係下一個Point，我一心以為亞B會同我一樣數完第三條河就直上，但結果佢都係揀左做安全派。而且夫人佢地仲好冷漠地說“你自己一個行呢條路啦！”～ 當時我心諗，如果咁樣行我衰左，會比佢地笑好～！都係唔好咁勇，跟佢地行大路穩當少少好。在平路上，我還可以跑下，但一上樓梯，就好累啦～打完POINT才發現那處樹林，並不是太綠呢，應該可以過～唉~總之就好後悔啦。(Ivan 由林過只係用左2分鐘...)

Pt2-Pt3

基本上冇得簡，只有直接去，集體創作有好有唔好，好的係當你錯的時候其他人會提醒修正，但唔好的就係其他人的決定會影響自己的判斷，就係咁，我們一行四人就開始落山啦～落的時間都有想過係咪要咁低，但見亞John一馬當先咁落到底，再過埋河，我們就好順理成章咁過埋去，直至去到一個山咀．．．當時我們以為過了個山咀便到Pt.3，但亞飯突然一句方向唔對，我們就停下來了，只遠遠望見亞B同亞John繼續在咀上走來走去。自己停下來的時候，自已再打一次bearing，發現真的不對，在四周圍望地形之際，又見到個女英精賽員走左過來，咁即係點呢，精英都錯？之後佢又在我們的位置附近尋尋覓覓了。 周圍望之際，遠遠見到男精英賽員，佢話佢唔用指南針，係數窩數過來的，唔通連數窩都數錯？在大家迷迷糊糊之際，終於定了地圖，才發現走了不少路，20min咁就用左啦～呢20 min簡直磨滅了我不少體能．．．（事後才發現，不少定向老手在這裡也“失手”）

Pt3-Pt4

20min的體能消耗簡直可憐，之後上Pt.4還要好努力咁爬返上山，打完Pt.3之後再打bearing確定方向，就不斷上不斷上啦！當時我還聽到後面亞飯問“我依家係邊？”，平時我聽到呢句，我都會停停睇睇圖，但今次冇，因為只要爬返上大路就得啦，所以好努力咁爬。最終都上返大路。

Pt.4-Pt.5
Pt.5唔難，而且見到Clive係前面，唔使睇圖，望住個人做attack point Cut入去打point走人。(不過因為我唔係由路入去，路途中聽到比兩位青年人話我冇公德心～踩死０的草)

Pt5 – Pt6.

先落返賽事中心，飲啖水，之後過去Pt.6，沿路入去，回頭見到飯同糖啦～！

Pt.6 – Pt7 (　由呢個Point開始，一路都有位勁人係左右~我諗佢好耐冇練跑，雖然睇圖好準，但一路行都聽到佢喘氣的聲，所以一路都同佢距離好近)

打完Pt6 走出大路再睇張圖個Pt 7，見到Clive行大路，我個心諗唔想再犯第二個point的錯（兜大路），結果由山窩爬上去，唔係太難，不過好多蜘蛛網，行行仲有隻大蜘蛛於樹間，如果唔係趴低少少，個頭頂就不知不覺多左隻蜘蛛都唔知啦！

Pt7 – Pt.9

沿山窩落去，冇乜特別（最緊要記得打point~!）

Pt9 – Pt10

剛剛落完山，又要爬上山啦，好鬼辛苦，但由於有勁人係左右，結果唔係好使睇圖，睇佢就得啦。

Pt.10 –Pt.11

沿路去，見到直昇機亭，再落去山窩。

Pt11 - Pt12

繼續沿樓梯落去，個Point都好明顯。

Pt12 - Pt13

我見糖先上大路再落去，於是跟佢，但落到差唔多point位時見到Ivan佢由不明顯小徑cut落去，快好多呀～！

Pt.13 - Pt.14

又要上山，好鬼辛苦！又上又落，簡直消磨意志。途中比我見到夫人（佢去緊Pt.10做乜行呢條路？）

Pt14-Pt15　

又要落山，沿頭先條路落，再由大路去。

Pt.15- Pt.16

又爬上山，今次終於唔同勁人同路啦～我行地圖上有繩個條路，條路好靚，但又唔係好明顯，結果得我一個行呢條，但上到頂位，又遇到勁人，佢問左我一句，沿路係咪有條繩？我答佢，係。仲好靚。之後我地又繼續“行” ．

Pt16 – Pt17

沿山咀落，仲比我見到Bruce游緊，之後佢都好醒目，跟埋我地去打Pt17。

Pt17-Pt18

冇思考過，直衝落大路跟隨Bruce打point，走人，去到橋位見到周生浸緊水（我心諗，０的水冇啦！）

終於返到終點，不過．．．好慢！好慢！　＞＿＿＜ 返到去，亞B第一時間話佢打漏Point。唉～咁辛苦走出pt 3 結果死在Pt 8 。

其後其他人都開始返來啦！ 如果計分，用第一名時間計，只係得500分，唉～點玩Ranking！

就因唔服氣，結果原本唔想玩第五場，現在都去埋，希望跑返好０的啦。 不過今次好多高手都死在pt.3！

後記：天生天養 http://juliechiu1008.blogspot.com/2009/09/blog-post_2729.html

愛靚唔愛命~?!

認識我的人都知道，我其實並不似個"女仔”！！

從前在青少年中心工作，衣著一向都好簡單，由最初跟 IEPA，都係要見Client或僱主的時侯，先至著好少少，其後我在中心的組/活動機乎有九成九都係戶外活動～（無計，呢間青少年中心係冇男同事ga~!）

而我在中心內都應該算是最愛去戶外活動的一個。所以衣著一般都以輕便為主，T-shirt、牛仔褲已經攪掂。當然有時要入學校或其他場合，衣著都會稍為檢點－因為這就說是工作形象！

但是自從移了入學校工作後，衣著都要轉變唔少，由其係在有宗教背景的學校工作，女士們也要穿裙子啊～！

其實我呢副“衰樣”著起裙係唔好睇，不過唔知點解，每次扮得斯斯文文的時候，同其他人講行山，露營的時候，居然每個人都投以驚奇的目光～！＝＿＿＝…..顯得有點難以置信。
但是當時間一過，每個周末都見我滿身傷痕的時候，他們開始相信了．．．．．

回想起，從前我也是個斯斯文文的小姑娘，玩的都係有靜悄悄的活動，例如寫生，拉下小提琴。不過由某一天開始，我改變了～！想起小提琴，都有三四年冇拉過，還記得上次應該是為一位童軍領袖結婚助慶之用～現在想起都有點可惜(有人結婚想助慶的話，我唔介意出山！！)。至於我盒好貴的畫筆呢～好似一年前送了給一位會考考美術的童軍仔了！

總括來說，現時除了在工作的時候，一般情況下，我還是原始人呢！

或許是穿得裙子多，近期鍾意行街睇較lady的服飾，而且還買了一對三吋高的高跟回家～坦白講，這是我最後悔的其中一件事。


星期五晚有個高中家長晚會，結果便穿了，起初出門口還沒什麼，但下午之後，對腳開始痛，但我還離家長晚會及放工有一段很長的時間。痛死我了，我曾嘗試貼上膠布，但是沒用的，想坐一坐休息啦，點知家長又殺到啦，結果還是硬著頭皮，撐下去！


活動結束回家的時候，我真的想赤腳回家，因為真的很痛呢！（女人比男更忍得痛）

回家脫鞋一看，結果發現除了腳止有水泡之外，還有腳跟位～成行位置！對鞋也沾了血跡。

結果在火滾的情況下，把心一橫，棄掉了那對鞋！棄置後，一點也沒後悔，因我寧願心痛也不要身痛。

請堅強

昨天又發生一件不快的事在定向人身上．．．

這一刻只可以說：

傷心的時候，請喊出來！
忿怒的時候，請叫出來！
疲倦的時候，請說出來！

為了自己和家人，請努力下去！

希望你很快和家人也站起來！

突然間想起陳奕迅有一首歌叫《單車》

歌詞描述一個孩子，坐在爸爸單車後座，抱著爸爸的感覺，非常動人。

歌詞說：

難離難捨，想抱緊些，茫茫人生，好像荒野。如孩兒能伏於爸爸的肩膊，哪怕遙遙長路多斜。

父親成為茫茫人生的避風港，成為生命教育最堅強的後盾。

913 郊遊日

昨天收到夫人電話，話去郊遊！由於我沒在意他們的說話，所以今日出發時，我還記不起什麼時間集合，打完電話問完先醒起，又唔記得在那裡集合，結果又一次樣衰衰咁再打多次。

去到集合地點附近，但我又唔知在那一個小巴站等好呢？結果還站在有風扇的位置等好，等等下見到一名定向人“成坤”，他當時向我打招呼，回應他後，我的心在想，乜佢原來住附近ga ? 今日冇定向，做乜佢又著定向衫咁怪？
結果他過了來，問我乜Bruce未到？０我～謎已經解開啦，原來他也是Bruce約的(但點解要著OL衫呢 ? 謎 )。等了一斷時間，他們終於來了～一看好多人啊！

我們在小巴站等了很久還未有車，結果由一輛本身唔經那邊的小巴載了我們前往，唔使5分鐘，個司機問我們是否要落車。當時我心諗“下！唔使咁快呀！”．結果真後好快咁我地又落車啦～之後就開始行。

其實今日真的有種去野餐、郊遊的感覺，本身想帶埋薯片，糖，但又怕被佢地話我，結果都係帶支水算啦～！我地一路行一路都有好多狗不停用佢地的聲音歡迎我們，好彩他們全部也在鐵絲網的範圍，對我們也沒太大危險。行行下我地就兵分兩路啦～一條會遠少少，另一條就直接好多，我行較遠少少個條。條路以經唔似地圖，一向睇慣圖的定向人都行錯，我地在無數的錯誤中，最終返回安全點。

最後到達大家集合的地方。去到見到夫人佢已經半死啦～但其實我地好似一直也在行平路．．．．．．＝＿＿＝

在休息的時間，我們也玩了起來～！

休息完之後，我地要面對的係一個上山路程，可能熱，又或未準備好，結果行上山也有點辛苦！

上到山上休息，很舒服啊！但夫人就好似死死下啦～！

我都唔明佢兩公婆，兩個人只帶一樽500ML的水，原來Bruce話見到支水只賣$3.5，但去到七仔就變左$7.5，嫌佢貴，唔買！結果難為了大家～！休息完之後會繼續行，我都好想跟～但眼見夫人都好似冇命，算啦! 做下好心陪下佢啦！結果偉大的女士們就回程啦，而男士們就繼續行。Harbour話“點解上左山又要落返山，好似好傻瓜”係呀！我都有咁的感覺。

出到市區，飲了一罐可樂後，醒曬！之後沖埋涼～我地等班男士等得唔耐煩，結果佢地仲著件新衫影相！！　之後大家再去食個Tea．7個人叫９個餐。咁我又肥左啦～！

回家時發現個天好可怕，有點似世界末日的感覺。估唔到大巴士真的有先見之明，取消了今晚的宣傳片拍攝工作。

一級定向教練班

早前被說得熱烈的一級定向教練班選拔，最終都已經塵埃落定。昨晚的課程亦開始了！

事前風波

由於個班不是每年一次，故此一出課程已經有不少人士有興趣報名，當然我也不例外。個班報名要求係要十八歲總會會員，持有第三或第四階段證書，屬會推薦，活躍定向人，還在兩年內的排名賽二場取得650分等．．．還有準一級教練優先。當然我知道合乎資格的人多不勝數，就連SOC也有4位！據大會消，息實際有18報名。我報名時其實都好險，因為我好努力才找回張第三階段證書，當找回啦！又唔見左張急救證書。但份報名表又有急救證書編號一欄，由於急救證書唔係報名必需，所以我只係抄個編號交比佢地（個編號我係自己份resume有紀錄的）但到八月，OAHK又叫我補回張證書啦～！唉！結果我花了一整晚將間房番天覆地才能找回！至於間房.......星期六才收拾吧 !

等了又等~~~~!!!

完成截止報名之後，等了一段時間也收不到任何消息～即係點呢！最終在八月中收到總會個電郵～電郵內容是通知本人合資格進行甄選。其後得知有人因為合乎資格但又交唔到副本，就係咁冇左啦～！而且仲要比左$100總會補返份證書！！好多人對此持不同的講法，但講真，我雖然為那位人士（X君）不值，至於佢係咪比人玩就見仁見智啦！總會都保障做足準備報名的參加者，尚算公平！

"教練"我不愛你

甄選分兩日進行，第一晚係筆試及面試，當晚應該有13人合資格，本身以為13人選12人，選唔到個個都好樣衰，結果都有拼命去問下人，至於溫書就始終覺得要睇的當然會睇，唔想睇的也不會記得。當晚出席的就只有10位，但教官(三級教練有至少6位 ) . 由於得返10位，咁係咪唔使擇呀？

筆試是考定向歷史，圖例及技術，其實唔係太難，但有樣野～就係筆試話明：答對有分，唔答冇分，答錯扣雙倍分。基於扣雙倍分的原則，都唔係好敢答！即使長少少的題目，都有點保留，例如“試說出指南針功能四點？8分”當時我諗....點知佢地的Model　Answer同我想的有冇出入嫁?！唔好寫咁多好似安全0的. 考完呢部份，還有第二部份筆試，要繪一條比Level　2的學員玩的Course包括提示符號同埋你set course 的原則/目的 .....

去到第三部份係面試．教練分兩組進行，佢地安排一些唔熟你的教練問你問題（我呢類小薯仔，應該冇乜教練識我啦，唯一唔使叫名都知我叫乜的就只有獅子教練）我係第一個入去的，去到有三位教練，獅子教練、高教練同埋威教練，一入到去．氣氛一沉，一個不停笑，一個又一直唔笑，另一個又想笑但又唔笑。即係點．．．我答的不是最好，但是當時我的腦真的就只有這些說話。

當晚在緊張的氣氛下完成了，在考試後聽大家的說話語氣中，大家也有點害怕的感覺，有害怕辛苦！有害怕沒時間！有害怕失敗！

但我相信心切也只好完成星期日的技術測試才想吧！

又有少了一個

星期六上午收到OA電話，問下午測試可否改做上午，其實由於有１０人，故此我們抽籤分了上午和下午進行，我. Leon . Joeshpine 及另一位霞姐是下午的，但收到電話咁問，我隨即答冇問題之餘還多口一句：點解？？原來Joeshpine退出了，但可惜由於Leon唔得閒，結果兩位女士們又要就佢在下午才進行。

去到回歸亭，獅子教練已經派試卷，１）指定放point　２)放自已條course 3) 收人地條course 全部限定時間，基本上有限定時間，只要我唔遲返來就得啦，所以我唔明另外兩位點解要咁快。

今日我只是普通戶外look，但另外兩位就係專業定向look，當時我心諗，佢地條course唔係咁甘呀，偷偷看了一下，啊天呀～！點解呢兩位人兄咁殘忍，level 2跑？收point條course係抽籤決定，不過無論點，我都係死！

在指定放point，一個係山窩，一個係山咀，原來放point 比打point更大壓力，打point的話只要去到，就可以周圍望下，但放唔同，總是好似放得不對勁，即使去到附近，但總是怕，結果我花了30分鐘才回到集合點～大會比45分鐘我地放。

錯了

之後放自已條course，先前獅子教練話可以比我地修一下，但最終比吳先生否決了！我們還是自已解決！我一路去，只是憑記憶放，當中我有一個point在大石，於是個腦就不斷想著大石，結果見有大石，就急不及待放了，之後好努力咁爬過個山，落到山再睇圖，死了，原來唔係第一粒石，是放在第二粒石，但由於當時差不多放完，而且又唔願意再爬過個山重新放過，之後又再爬多次返來，結果我放棄修改，只想回去時通知教練我改了point，一返到去，我自首向吳先生說，我有個位放錯了，改了地點，但佢一句：唔好影響我，等其他人收point先講！

好！就等收point，我收leon條course，足足滑了三次，吃了3個蜘蛛網，佢自已放point都叫我某些位唔好直接去（當時我心諗，你都知死呢），結果我好可憐咁花了50分鐘才回來，真的很辛苦呢，因為佢條course臨尾先要人不斷上山不斷上山，想死！

至放我條 course的大石point，當然他們找不到，最終我告訴了他們我放了在地圖那一個位置，佢地話好在我都佑自己放錯的位置，而且又問我點解知到錯唔放返好佢．．．．．．．結果我還是辛苦地帶霞姐上山再找多次。好累啊！

我還以為一定被他們罵，但佢地又冇罵我，還叫我上level 2要練好體能。而且最後還每個人派12個marker，話我地上班時用～呢句說話係咪即係收我地呢?? ^^

最終我們一行9人也收了。

餘波未了．．．

在一級教練班甲部運動通論，OAHK在報名表上有平日上課和假日上課時間選擇，最初我當然選擇星期六、日才上課啦，但結果OAHK打電話來告訴我們，原來上星期六、日的課是沒可能的，要求我們改上平日課，當時我真的很忿怒，因為如果一早知道日期相撞，點解又會放在報名上呢?？

若上課的時間沒有選擇，其他人就可以知道時間唔得，咪唔報名lor。但現在卻要考完試先話比你知你擇的時間唔得，咁都幾”無謂”！

結果我還是在心心不忿的情況下，罵了OAHK職員幾句，但無奈也要死死地氣選擇上平日課～星期一至五要我晚上七時正去到烏溪沙，難啊！

一段很可愛的說話

節錄自「平昌懸一所中學牆壁上的訓勉」

學會做人，先從學會感恩開始。

學會做事，先從學會掃地開始。

學會學習，先從學會思考開始。

學會健身，先從學會體操開始。

學會禮貌，先從學會敲門開始。

學會文雅，先從學會走路開始。

學會交往，先從學會微笑開始。

學會生存，先從學會自護開始。

學會自律，先從學會守紀開始。

學會審美，先從學會穿衣開始。

起初看到時覺得很有意思，之後再睇多幾次就想起小學生時候的一些必要自已處理的事情！

“新火”相傳？

早前被罵得熱騰騰的東亞運動會開幕儀式地點，最終在眾人的壓力下，地點改了！到底是在上者冇腦？還是一站式服務十分吸引（佢地乜都唔使做，比人搞曬）？被人罵是抵死的！

說到東亞運動會，我最不喜歡那個在將軍澳的運動場，不知是設計的人冇腦，還是跟本沒諮詢過運動員意見，成個場地～中間草地，跑道及跑道以外的地方都是綠色的，唔係綠色唔靚，但至今除了這個場地外，我相信全世界的運動場都會將跑道和以外的地方分顏色，最常用的是橙色作跑道，綠色/藍色作以外地方，好讓運動員在跑步其間意識到，不會跑出線，但將軍澳呢個場就好奇怪咁用一整色，連埋個草地，成個場都係綠，如果比賽的運動員適應唔到，可能真的會有跑出界都唔知。

東亞運動會是香港一項的體育界盛事，還餘下的就只有兩個月，但是在香港你可找到什麼呢？我什麼也沒找到．．．但是錢總是花了很多，那麼錢去了那裡？在別人的肚子裡。

星期六因為要工作，未能觀看聖火相傳的活動，真的有點可惜！但居然被我在校內遇到這位舊生，立即跟他來張照片！雖然我唔知道這位同學叫什麼名字，但是總被他手上的火炬吸引著～冇錯，他是其中一位傳遞聖火之運動員！名字呢？還不知道．．．

聖火已傳，但大家對這項盛事之(怒)火還未熄呢～！